دايس على عسلك

النهارده 14-12-2013 

المفروض انى  بعت الموبايل اول امبارح عشان اشترى واحد تانى 4G
 
مكنتش اعرف انى مدمنه اوى كده .. انا كنت طول النهار ماسكاه
 
مش عارفه ليه بس يمكن كنت بهرب بيه من الواقع الى بيرفضنى احيانا واروح عالم تانى مع ناس تانيه .. اصدقاء الكترونين ومتابعين وصور ,, من الراديو دا للفيديو دا ,, ايميل هنا و واتس اب هنا ,, مكالمه دولى (فايبر) على فيديو من هنا (تانجو و chaton )

        مكنتش اعرف حاجه عن حد ,, لا عيلتى ولا اصحابى ولا جيرانى ولا اى حد

باختصار استبدلت الواقع بعالم تانى خيالى .. ولا صداع ول دوشه ولا مين قال ومين عاد ,, حتى الاخبار والتوك شوز وستار اكاديمى والتليفزيون كله قاطعته عن غير قصد طبعا

منكرش ان كان ليه مميزات ,, دا كفايه انى كنت مستريحه من النميمه :D (ملحوظه بمناسبه النميمه : انا مقاطعه الفيس بوك من فتره)

         كنت كل فين وفين اقفل الموبايل 5 ايام فى محاوله ان مخليهوش يسيطر عليا وابقى انا المسيطره عليه

كنت بنجح ال5 ايام دول وارجع بشغف اكتر من الاول .. زى المدمنين او الى بيعمل رجيم قاسى فيحرم نفسه من الاكل واول مايخس يرجع تانى ياكل كأن اخر مره هايشوف فيها الاكل

              لحد ما قررت ادوس على نفسى وعلى عسله .. بعت الموبايل عشان احدثه وانا مش عارفه هاجيب ايه بداله

انا جالى اكتئاب اسبوع عياط على لا شئ واى شئ و من كل شئ , الاسبوع دا بقى عرفت فيه حاجات كتيييييييييييييييير مكنتش اعرفها قبل كده , روحت لتيته وعرفت انها  عيانه , وقابلت ناس صحابى مشوفتهومش من سنين

بس المشكله انى بقى وشى فوش ماما ومابنبطلش خناق :D

لو كل واحد حاول يرفع راسه من شاشه الموبايل... هيكتشف ان في حياه شغاله حواليه..هو مش واخد باله.<3

سنه حلوه يا شهيد

مبحبش اكتب فالمدونه عن السياسه بس معلش كلمتين واقفين فزورى :

  النهارده 2/2/2013  ذكرى موقعه الجمل 2011 واحداث بورسعيد 2012 (سنه حلوه يا شهيد)

بعد الاحداث الى شهدتها بورسعيد الاسبوع الى فات , بعد القناصه و ال 40 واحد الى ماتوا و500 مصاب , وبعد ما سمعت ان الدورى هايبدأ عادى جدا ولا كأن فى 72 واحد ماتوا السنه الى فاتت وان دا ممكن يحصل تانى بكل سهوله ,و بعد الى سمعته امبارح من والده محمد الجندى مع محمود سعد فبرنامج اخر النهار  على قناه النهار وبعد ما شوفت متظاهر الاتحاديه الى الشرطه قلعته وسحلته على مرأى ومسمع العالم كله وهو بيرجع فكلامه ويقول ان  المتظاهرين هما الى قلعوه والشرطه انقذته

  

بعد كل الاحداث المؤسفه دى ,  

 احب احكيلكوا حكايه بنت اسمها "الشرطه"

" الشرطه "  الفتاه المدللـه الى اتولدت وفى بقها معلقه دهب ايام النظام السابق .. اتولدت واتربت على انها احسن من الناس كلها .. جزمتها فوق رقبه الجميع والكل بيعملها الف حساب وحساب

تيجوا انتوا يا حبه ثوار ولاد امبارح تقفوا قدامها وتلوا دراعها اليمين امن الدوله  تسجنوا ابوها الى مدلعها وتضربوها وتطردوها من بيتها وتاخدوا اسلحتها ايام الثوره !!

وهى بنت الناس الى طول عمرها مناخيرها فوق  ...

 مستنيين ايه بقى  بعد كل دا ؟؟ ...

بعد ما قلعتوها وعرتوها قدام العالم وبينتوا وشها القذر وانيابها المستوره خلف قناع الديموقراطيه !!!

طبيعى جدا انها اول حاجه هاتفكر فيها اول ما تشم نفسها انها تنتقم منكم .. ويا سلام لو نظام مقموع من 80 وحابب يطلع عقده عليكوا دى اول واحده هاتيجى معاه وهاتساعده  , حتى لو كان النظام دا " الاخوان" الى كانت بتعملهم حفلات تعذيب فالسجون والمعتقلات

عزيزى الشعب ,,

دا مش فيلم امير الانتقام .. دى سياسه وزاره الداخليه

ودى الفيديوهات 

   

 والده محمد الجندى مع محمود سعد على قناه النهار

ودا الراجل الى اتسحل و اتعرى قدام الاتحاديه

وده حماده بعد ما شرب شاى بالياسمين

" اكتب يا هيبا ، فمن يكتب لن يموت أبداً ”

البلوج دي رأى الشخصي فى الروايه.

الروايه بتدور حول راهب اسمه هيبا زى ما اطلق ع نفسه فى القرن الرابع الميلادى مدون قصه حياته فى عده رقوق , والرق زى برديه بيكتبوا عليها
 يعنى هو البطل والراوى فنفس الوقت ,  والى كان صاحب فكره التدوين هو الشيطان عزازيل الى كانت جنبه وهو بيكتب
 
كان طفل من اخميم ابوه وثنى وامه مسيحيه فالفتره الى اعلن فيها الامبراطور قسطنطين اعترافه بالمسيحيه كدين رسمى للامبراطوريه و امر بوقف حمامات الدم الى كانت شغاله ايام دقلديانوس ومكسيميانوس وخلفاءهم على المسيحين

وقت الروايه تاريخيا بعد الفتره دى بشويه طبقا لمجمع افسس المذكور فيها والى كان المجمع المسكونى رقم  3 وكان سنه 431 م فى ظل حكم الامبراطور ثيئدورس الثانى

فالفتره دى المذكور فالروايه ان اتباع الدين الجديد فى مصر (المسيحيه) زادوا و زاد سطوهم ونفوذهم بعد اعلان الامبراطويه المسيحيه لدرجه اضطهادهم للاقليات الوثنيه الموجوده فى مصر

ومن مظاهر الاضطهاد المسيحى للوثنين كما تذكر الروايا قتلهم لكتير من الوثنين الى رفضوا اعتناق الدين الجديد وهدم التماثيل الفرعونيه وتشويه جدران المعابد والاسقف عن طريق المرور عليه بجريد نخل محروق  عشان يبددوا ملامحها كلها

ومن ضمن الناس الى ماتوا نتيجه الاضطهاد كان والد هيبا الى قتله اقارب والدته المسيحيين امام عينيه
بعد الحادثه دى ام هيبا اتجوزت واحد من اقاربها الى شاركوا فى قتل والده .. مستحملش هيبا الحادثتين وهرب على عمه فى النوبه وعاش معاه و قرر دراسه الطب .. عرض عليه عمه انه يجوزه واحده من النوبه ويفضل عايش معاهم لكنه رفض يتجوز واختار انه يترهبن

تعليقى ع الجزء دا

مش عارفه ازاى هيبا بعد ما هرب من امه المسيحيه وزوجها الجديد واقاربها فضل مسيحى .. بالرغم انه كان عايش فى النوبه عند عمه الى المفروض وثنى زى ابوه والمفروض انه فى امان .. وفضل معتنق المسيحه الى مش مقتع بيها وكمان اختار انه يبقى راهب
مش لاقيه للنقطه دى سبب
 بس الى متأكده  منه انه اختار الرهبنه كنوع من الهروب من الواقع ومن العالم الى قفل فى وشه ابوابه وقبل ما يبلغ مبلغ الشباب , كمان كان عنده عقده من الى عملته امه .. كان حاسس انها شاركت فى قتل ابوه عشان تتجوز واحد من اقاربها ..

ببساطه عقده الخيانه الى بتبقى عند كتير من الرجاله .. بس دا مش مبرر انه يترهبن
كان ممكن يفضل وثنى و ميتجوزش ويدرس الطب ويقضيها خصوصا ان ماكنش موجود ما يمنع الزنا فالوثنيه

"أنا لن أكون أبا أبدا ،ولن تكون لى زوجة و أبناء.لن أعطى هذا العالم أطفالا ليعذبهم كما تعذبت،فلا طاقة لى لاحتمال عذاب طفل..” 

مش مذكور فالروايه هيبا اترهبن امتى او فدير ايه او على ايد مين ؟؟
الفتره دى ماكنش بيتعمل فيها اختبارات الرهبنه القاسيه الى بتتعمل الايام دى عشان يقيسوا قدرته على تحمل الصيام لفترات طويله والعيش فالصحراء حيث ندره الموارد وصعوبه المعيشه مع جو الصحراء القارى شديد الحراره صباحا شديد البروده مساء
والقيام مبكرا لتأديه الصلوات .. كان اى حد بيحب بترهبن بيروح البريه يتتلمذ على ايد احد شيوخ الرهبان انما هيبا مارحش لحد
طب مين رسمه راهب ؟؟ ومين اداله الزى ؟؟

من المعروف ان الرهبنه بدأت من مصر على ايد الانبا انطونيوس وانتقلت بعد كدا الى العالم .. وتقوم الرهبه على 3 ندور (اساسيات اوشروط ) وهم 1- البتوليه 2-الفقر الاختيارى 3- الطاعه

“الرهبنة ذاتها موقف دائم من الحياة، فكيف أزعم أنني ودعتها؟!”

بعد رهينته خرج هيبا من اخميم قاصد الاسكندريه لدراسه الطب .. الاسكندريه كانت العاصمه وكانت محرمه ع المسيحين والجنوبيين دخولها زى ما مذكور فالروايه ( معنديش خلفيه تاريخيه عن الموضوع دا .. فى الغالب قصور منى )

بالنسبه للقاء هيبا بأوكتافيا طبيعى ان واحد حارم نفسه من حاجه (الزواج) عشان حاجه هو مش مقتنع بيها (الرهبنه والمسيحيه) يضعف قدامها .. كانت قدامه الفرصه انه يعيش حياته ويتخلص من الرهبنه الى هو مش مقتنع بيها , بس طموحه فى انه يبقى طبيب مشهور وان اوكتافيا كانت مجرد جاريه
كان سبب رفضه العيش معاها رغم السعاده الى كان بيوصفها ووعودها ليه والقصر الى كان هايعيش فيه

"سوف أوزع أوقاتى بين الطب و الشعر،أداوى بهذا الأجسام وبذاك الأرواح. والكلمة قد تفعل فى الانسان ما لا تفعله الأدويةالقوية،فهى حياة خالدة لا تفنى بموت قائلها.” 

هيباتيا السكندرية (350-370 تقريبًا - 415) هي فيلسوفة تخصصت في الفلسفه الافلاطونيه و تعد أول امرأة في التاريخ يلمع اسمها كعالمة رياضيات وكما لمعت في تدريس الفلسفه والفلك
"الكاتب برع فى وصفها لدرجه انى حبيتها ع الوصف ,, وكان من الفصول الرائعه فى الروايه و الخلفيه التاريخيه لهيباتيا مطابقه للروايه"
ماتت هيباتيا  على ايد غوغاء من المسيحيين يعد تعذيبها وسحلها زى ما مكتوب فالروايه




الاسقف كيرلس المذكور فى الروايه هو البابا كيرلس الاول (عمود الدين ) البطريرك 24 ويعتبر من المفكرين المسيحيين وليه كتب ومؤلفات بيتاخد بيها لحد دلوقتى فى كتير من الامور الدينيه المسيحيه
كان مثقف وعالم ووجه عنايته لمناهضة العبادة الوثنية والدفاع عن الدين المسيحي وقام بمناوئة أصحاب الفكر غير الارثوذكسى حتى تمكن من قفل كنائسهم والاستيلاء علي مقتنياتها الذهبيه ثم أمر بطرد اليهود من الاسكندريه فقام قتال وشغب بين اليهود والمسيحيين وتسبب عن ذلك اتساع النزاع بينه وبين الوالي.
بالنسبه لارتباط اسمه باغتيال هيباتيا مفيش عنه خلفيه تاريخيه مؤكده غير يقال بس مفيش اثبات قاطع

 

بعد اغتيال اوكتافيا وهيباتيا هرب هيبا تانى من الاسكندريه للقدس , بعد وصوله عكف هيبا على دراسه الطب ومداواه الناس مجانا كقول الانجيل "مجانا اخذتم , مجانا اعطوا "

ماكنش قادر ينسى الى حصل لابوه واغتيال هيباتيا الى كانت بدأت تبقى مثله الاعلى على ايد نفس الناس تقريبا وموت اوكتافيا برغم البعد المكانى والزمانى لان كانت مرت فتره طويله
احتفاظه بالاناجيل المحذوفه والكتب الممنوعه نوع من الانتقام من الكنيسه الى كانت السبب فى حرمانه من كل الناس دى فى وجهه نظره خصوصا انه مكانش قادر يواجهم بالى عملوه  او يعترض علنيا على اى حاجه حتى لو شايفها غلط

“ولم أر أي شيء من داخله، أنا أطوف دوما بظاهر الأشياء ولا أغوص فيها. بل أراني أخشي الغوص في باطني لكي أعرف حقيقة ذاتي الملتبسة.” 


المبجل نسطور شخصيه حقيقه بطريرك القسطنطينه فى حكم الامبراطور ثيئدورس الثانى و فضل استعمال عبارة(والدة المسيح) بدلا عن(والدة الله) في وصف مريم العذراء. نشبت على أثره خلاف عقائدي بينه وبين كيرلس بطريرك الإسكندرية أدى في نهاية الأمر إلى حرمانه ومنع تعاليم مدرسه الرها المقربة منه.

اعجاب هيبا بنسطور وبالاخص ان هو على خلاف مع كنيسه الاسكندريه  يعتبره ايضا نوع من الانتقام من الظروف والانتقام من كنيسه الاسكندريه ,  كان شايف فيه البطل الى هايجيبله حقه وحق ابوه وحق هيباتيا من الاسقف كيرلس بانه يطلعه غلطان ويكسر شوكته وشوكته المسيحين المصريين  بشكل عام 


هيبا من وجهه نظرى حد جبان وخواف ومش عارف هو عاوز ايه .. لو كان عنده قدرمن الشجاعه مكانش اعتنق المسيحيه وهو غير مقتع وكمان يترهبن دا رعب مش خوف بس
جبان انه مرضاش يتجوز من بيت عمه فالنوبه عشان مراته متخونهوش زى ما خانت ابوه
جبان لما اخفى الكتب المحذوفه وبقى بيقراها فالسر
جبان انه مقدرش يواجه المسيحيين بأخطاءهم و فرح بنسطور واكتفى انه يتفرج

"الحمار لا يمكن بحال أن يكون غبياً ، هو صبور بطبعه . وقد يبدو الصبر غباءاً أحياناً و جبناً أحياناً . يبدو أنني قضيت عمري حماراً"

 عايش جوه نفسه من كتر الخوف من مواجهه الناس حتى لو كان فوسطهم

"لطالما أحببت الأشياء التي تتم، فقط، في داخلي. يريحني أن أنسج الوقائع في خيالي، وأحيا تفاصيلها حيناً من الدهر، ثم أنهيها وقتما أشاء. تلك كانت طريقتي التي تعصمني من ارتكاب الخطايا، فأظل آمناً"


مرثا .. مكانتش هفوه ولا حاجه والى عمله معاها كان لازم يعمله .. هو عاش الفتره دى كلها فالدير منتظر اللحظه دى
لو كانت الرهبنه فى دماغه فعلا كان تاب على الاقل او ندم خصوصا ان الزنا مش حاجه سهله  بالنسبه لراهب


عزازيل .. انا وانت وهيبا وكل الناس .. الساكت عن الحق 

احنا الى صنعنا الشياطين عشان نرمى عليها اخطاءنا وضعفنا وجبننا ..
ادم لما اكل من التفاحه قال ان حوا الى اغرته وحوا قالت الحيه .. واحنا زيهم كل ما بنعمل حاجه غلط بنقول الشيطان غوانى
والحقيقه ان الشياطين لو موجوده فعلا هاتتعلم مننا


          شيطانك ففكرك وعملك ورؤياك واحلامك .. متظلموش الشياطبن

كدا الروايه تقريبا خلصت .. المؤلف بيقول انها حقيقه

الابداع بيبقى فان المؤلف بيجيب احداث وشخصيات حقيقه وينسج عليهم من خياله , بحيث الى القارئ يحس ان الواقع نتيجه للروايه مع ان الحقيقه العكس :)

اكتر فصل عجبنى فيها الفصل 29 "الحضور"  اوانا سميته المواجهه انصحكوا تقروه حتى لو مقرتوش الرويه كلها

ودى جمل عجبتنى فيها

“الحياة ظالمة فهى تمتد بنا وتلهينا , ثم تذهلنا عنا وتغيرنا , حتى نصير كأننا غيرنا”

“الأشياء مثل بقية الأشياء .. لا يمتاز منها إلا ما نُميِّزه نحنُ بما نكسوه به من وَهْمٍ و ظنٍ و اعتقاد”

“كل المهرطقين هنا ، كانوا مبجلين هناك!”

" لطالما أحببت الأشياء التي تتم فقط في داخلي. يريحني أن أنسج الوقائع في خيالي، وأحيا تفاصيلها حيناً من الدهر، ثمّ أنهيها وقتما أشاء. تلك كانت طريقتي التي تعصمني من ارتكاب الخطايا، فأظل آمناً”

"يا هيبا ، قلتُ لكَ مراراً إنني لا أجئ ولا أذهب . أنت الذي تجيئ بي حين تشاء . فأنا آتٍ إليك منك ، وبك ، وفيك . إنني أنبعث حين تريد لأصوغ حلمك ، أو أمد بساط خيالك ، أو أقلب ما تدفنه الذكريات . أنا حامل أوزارك وأوهامك ومآسيك ، أنا الذي لا غنى لك عنه ، ولا غنى لغيرك .” 

“أنا يا هيبا أنت ، وأنا هم. ترانى حاضراً حيثما أردت ، أو أرادوا. فأنا حاضر دوماً لرفع الوزر ، ودفع الإصر ، وتبرئة كل مدان. أنا الإرادة والمريد والمراد ، وأنا خادم العباد ، ومثير العباد إلى مطاردة خيوط أوهامهم.”

 “كل الكائنات تحب النزول ، وتبتهج له، إلا الانسان الذي يخدعه وهمه وتحدوه أحلامه، فيبهجه الصعود والترقي”

"قال يسوع المخلص، في أول عظة ألقاها على الناس:
طوبى للمساكين بالروح، فإن لهم ملكوت السماوات.طوبى للودعاء، فإنهم يرثون الأرض.طوبى للحزانى، فإنهم يتعزّون.
وأنا يا إلهي، لا أطمح إلى ملكوت السموات، ولا وراثة الأرض، ولا حتى العزاء.كل ما أرجوه، أن ينطفئ اللهب الساري بين ضلوعي، وأن تذهب عني الآلام التي ألقت بي في هذا الركن منبوذاً، مهاناً”

 " الآلهة على اختلافها , لا تكون فى المعابد و الهياكل و الأبنية الهائلة, و إنما تحيا فى قلوب الناس المؤمنين بها,وما دام هؤلاء يعيشون ,فآلهتهم تعيش فيهم”

“لماذا أخاف الموت؟ يليقٌ بي أن أخاف من الحياة أكثر، فهي الأكثر ايلامًا.” 

"ها قد امتلأ الرق، وما انتهت الذكريات التي صيرتها الكتابة حاضرا يعاش مرتين، غير أنني أراها على نحو جديد كلما مضت السنون، وكلما استرجعتني من الماضي البعيد...وها هو عقد التذكر ينفرط مني، ويكاد خيط التدبر ينقطع...”






 

حلم قديم

كل ما اشوف مسلسل من مسلسلات السيرة الذاتيه لشخصيات اواخر القرن التاسع عشر او اوائل القرن العشرين  ..
بتنتابنى (حلوة بتنتابنى دى D: ) المهم بتنتابنى حاله شوق ورغبه فظيه انى اركب اله الزمن وارجع للفترة دى ,, بدايه عصر النهضه (مش النهضه بتاعه مرسى لا دى حاجه تانيه ) واشوف بقى رفاعه الطهطاوى وقاسم امين واحمد رامى وجبران خليل جبران وامشى فمظاهرات ضد الانجليز ... يااااااااه كانت هتبقى احلى اياام 
بس انا بنت !!! 
والفتره دى كان الستات والبنات فيها معزولين عن الرجاله !!! 
يعنى ماكنتش هاشوف حد من اللى بتكلم عنهم دول !!!
بتخيل نفسى لو انا بنت وكنت فعلا فالفتره دى .. كنت ممكن ابقى حاجة من 3 حاجات فبالى دلوقتى ,,


1- بنت فقيرة من قريه فالصعيد (زى تيته مثلا)
تيته مكانتش فقيرة بس كانت من الصعيد اهلها جوزوها وهى عندها 11 سنه جدى كان اكبر منها ب 20 سنه ومكنش غنى فمعاشتش المستوى الى كانت فيه بس قبلت جوزها كده ورضيت بالامر الواقع وكانت بتشتغل خياطه وتساعده لحد ما جم بورسعيد بعد الهجرة والحال اتحسن وابنهم سافر الكويت وربنا فتحها عليم وبقوا من كبار التجار فبورسعيد دلوقتى 

** دراما اوى حكايه تيته دى ..
 انا لو كنت مكانها واهلى حبوا يجوزونى بالعافيه كنت هربت منهم واخدت "الديزل"    او " القشاش " ونزلت ع "المحروسه"واشتغلت رقاصه زى "تحيه كاريوكا " D:  

2- بنت من حارة ف حى شعبى فقاهره المعز 
اكيد بابا كان هيبقى بشنب يقف عليه الصقر  زى "سى السيد" وماما كانت هتبقى ست طيبه زى "امينه" وانا كنت هابقى بنت بضفاير بصحى اول ما الديك  يدن والم البيض من عشه الفراخ الى فوق السطوح وانزل اعمل الفطار لابويا واخواتى واقف استناهم لما يخلصوا وبابا يروح المطبعه ( كل الابهات زمان كانوا بيشتغلوا فمطبعه مش عارفه لييه ) واخويا ينزل يستنى البت "بتعه" بنت الشيخ "مرزوق" العطار على ناصيه الحاره عشان يبصبصلها
اخلص انا تسيئ (حتى الان لم يتوصل العلماء لمعنى كلمه سيئى البيت .. ممكن تبقى كلمه فرعونيه قديمه بس شمبليون نسى يترجمها لما فك رموز حجر رشيد) البيت واقف فالمشربيه واستنى "راءف" افندى♥ ♥  .. بشكاتب قد الدنيا فأرشيف وزاره الاشغال 


يا فرحه قلبى لما اشوفه راجع وطربوشه الاحمر على راسه ويبصلى بطرف عينه ويمسح على شنبه بإيديه ويلاعبلى حواجبه (غزل قديم فحت) وانا ادارى وشى بضافيرى واقفل المشربيه واطلع اجرى البس ملايتى اللف واليشمك و اخبط فماما فتقولى مالك يا بت مش على بعضك ليه وكنت بتعملى ايه فالمشربيه وانا اتلخبط واقولها : ايه !! لأ يا "نينه" دا انا كنت بنشر الغسيل واطلع اجرى ع السطوح واقعد اأكل فالفراخ وانا بافكر "فراءف" افندى 

يااااااااااااااااه يخربيت الحب وايامه ♥ ♥ 
**لحظه كدا ..
بردو روايات "نجيب محفوظ " لسه مأثره عليا ..
لو كنت فالايام دى فعلا كنت كافحت عشان اكمل تعليمى وانضميت ل" هدى شعراوى "والحركات النسائيه فالفتره دى (من ورا اهلى طبعا ) وطلعت مظاهرات ثورة 1919 عشان ادعم "سعد باشا زغلول" وقعدت اقول الهتافات القديمه .. سعد سعد يحى سعد 
الاستقلال التام او الموت الزئام ( الى يعرف يعنى ايه زئام يقولى والنبى) ..و يا عزيز يا عزيز كبه تاخد الانجليز ..
اياااااااااااااااااااااام


3- برنسس من بنات البشوات :)
والبس الفساتين اللى شبه الساعه الرمليه  ولما احب اتفسح اروح حفله فكازينو "بديعه" او اروح ارقص  فالحفله الى بتعملها طنط "عنايات" كل شهرفالقصر بتاعها و يبقى عندنا عزبه فيها اسطبل احصنه و "فرحانه" تولد حصان ابيض واسميه "مايسترو".. واحب "على" ابن السايس بتاع الاسطبل وبابا ميرضاش عشان احنا فين وهما فين بس مش هيبقى ليا اخوات ولاد ( اصلى مبحبهمش ) 
بس هتبقى عندى اخت اسمها "هدى" و مش هاتبقى راضيه عن الحب دا .. وهاتعمل نبيهه وواعيه وتجوز "احمد بيه" ابن "فكرى باشا" بس هايطلع مدمن خمره وزير نساء وهايعيشها فمرار وهاتتطلق وترجع البيت
بس انا ساعتها هبقى هربت مع "على" يا ويكا وهانعيش فأوضه فوق السطوح فالسيده لحد ما الثورة تقوم والعزبه بتاعتنا تتوزع ع الفلاحين وبابا يبقى فقير والسايس يجى يعايرة ويشمت فيه .. عشان مش كل الناس طيبه زى الافلام ..هع هع هع
 طبعا "على" ابوه سايس وهو مادخلش الجيش عشان ملوش اخوات  فهانخرج م المولد بلا حمص  O.o
يلا دى اخره الى يعصى ابوه وامه .....


** اللى فات دا كانت النسخه التركيه من فيلم "رد قلبى"  لو كان معايا فلوس فالفتره دى .. كنت اول حاجه هاعملها هسافر " فرنسا " بلد الجن والملائكه ♥  وكملت تعليمى هناك وكنت اخدت ماجيستير ودكتوراه فالادب ورجعت مصر بنيت مكتبه ضخمه و مدرستين وتلات اربع جامعات و شاركت فتمويل العمليات الفدائيه ضد الانجليز (فالسر طبعا) .. وهاعمل تنظيم سرى للفلاحين للقيام بثورة ضد الاقطاعيين والملك و امولهم بس بشرط الثورة يبقالها قائد عشان محدش يسرقها (زى ما حصل للثورة بتاعتنا )
و مكنتش طبعا هادعم تنظيم الضباط الاحرار ولا جماعه الاخوان المسلمين ..  :(

مايسترووو
  ♥ ♥

      كان زمن جميل وايام جميله والناس كانت بسيطه , ابسط احلامها تذكرتين سينما لفيلم الورده البيضه بتاع "محمد عبد الوهاب " و"راقيه ابراهيم" ,,


كان سندوتش البولوبيف فيه رومانسيه اكتر من  الكومبو بتاع كوك دور .. و التاكسىكان بيقف اول ماتشاورله دا لو احتاجت تركب تاكسى اساسا لان الاماكن كانت قريبه من بعض والمواصلات ماكنتش لاقيه الى يركبها


كنت لما تحب تسمع الاخبار تقعد ه القهوه وتسمع الراديو , هى محطه واحده مش هاتقعد تدوخ من كتر الفضائيات


يا ريت كان فيه اله زمن ترجهنا تانى لأيام زمان بس كما يقول الفرنسيون " c'est la vie  " ابيض واسود :)